'Lal Isua hming i fak ang u' leh a chhehvel

'Lal Isua hming i fak ang u' leh a chhehvel

- Ruatpuia Pa

Lal Isua hming i fak ang u

Angel chawimawia chu,

Lalber lukhum la chhuak ula,

Lalber khumtir rawh u. KHB No. 50

He hla phuahtu, Edward Perronet-a hi kum 1726 khan England-a Sunbridge khuaah a piang a. Amah hi French hnam a ni a, England a seilian a ni thung. A pa Vincent Perronet-a hian hun rei tak chhung chu John Wesley-a rawngbawlna a pui thin a, chanchintha rawngbawlna hi a tuipui hle a ni. Hei vang pawh hi a ni ang Edward-a pawh hi a lo puitlin hnu hian sakhaw mi tak a rawn ni chho a. Anglican Kohhranah Pastor hna a thawk a, harsatna hrang hrang karah pawh rinawm takin a thawk zel a. Amaherawhchu an kohhranah harsatna namen lo a lo chhuah tak avangin Pastor hna chu a bansan a, John Wesley a rawngbawlna chu a pui ve ta zawk a. Chutianga hun rei tak chhung Wesley-a a zui hnuah chuan Independent Church of Canterbury-ah pastor hna bawk a thawk leh a, he kohhranah hian a thih thlengin a thawk a, January 2, 1792-ah  he khawvel hi a chhuahsan ta a ni.

He hla hi Thupuan bung 4:11 leh bung 19:16 tlawhchhanin kum 1779 tawp lam a a phuah a ni a. Mi ngaihsan a hlawhin reilote chhungin a lar hman hle nghe nghe a ni. He hla hi hla ropui tak a ni a, ' Kristian Hla pui' tih a hlawh hial a ni. Khawvel hmun hrang hrangah Kristian ten an hlutin Pathianin nasa takin mal a sawm a. A hria a piangin anmahni tawngin an letling zel a ni ber mai. Tunah hian tawng chi hrang za tam takin an letling tawh nghe nghe a ni. Lehkha ziaktu ropui tak pakhat chuan, 'khawvel awm chhung in a dai tawh ngai lovang a, vanah pawh bang lovin an la sa zel ang' a ti hial mai.

He hla hian chanchin ropui tak leh ngaihnawm tak tak a ngah hle a, chung zinga pakhat chu han tarlang ila. India rama Missionary rawn kal hmasate zinga pakhat, EP Scott chu tlang mi, hnam mawl ho zingah Pathian rawngbawl turin a kal a. Khua a va thlen chuan vawilehkhatah rinloh takin chung hnam mawl ho chuan amah tihhlum tumin hriamhrei nen an rawn hual ta rup rup mai a. Scott-a chuan tihngaihna a hre lo hle mai a, chutah a ipte a Violin chu a la chhuak a, urhsun tak leh tihtak zetin he hla hi a sa ta ringawt mai a. Chutia tihtak zeta Scott a zai lai chu chung hnam mawl ho chuan tihhlum tum ta mai lo chuan an en ta thup mai a, chang li-na :

Khawvela mi ze tinrenga,

Chitin awm bawk te u;

Chawimawina zawng zawng pe ula,

Lalber khum tir rawh u.'

tih a han sa thleng chu le, an hriamhrei ken lai an thlauh ta phawk phawk mai a. A hla sak awmzia an hria pawh ni si lovin Pathianin hna a thawk a, leiah bawkkhupin an tap ta zawih zawih mai a ni. Pathianin he hla hmang hian  an thinlung ah nasa takin hna a thawk a, tichuan Scott-a chuan a damchhungin chungho zingah chuan rawng a bawl theih phah ta a ni.

A phuahtu hian chang li chauh a phuah a, a hnuah Sir John Rippona'n  tlem a rawn ti danglam a, chang hnih dang a phuah belh leh bawk. Tuna Kristian Hla bu a chang thumna hi Rippona phuah belh chu a ni a, a phuah belh chang khat dang erawh chu Kristian Hla Bu ah hian tihlan a ni ve ta lo.

He hla Zotawnga min lehlin sak tu hi Zosapthara a ni a. Tin, he hla hi lengkhawm zai pawhin sak a ni ve thova, a lengkhawm zai thluk erawh hi chu lengzem hla thluk atanga lak a ni thung.

June, 1996