KUM 2018 KAN LO THLEN HIAN

KUM 2018 KAN LO THLEN HIAN

Hun a ral duak duak  a, Kum 2018 kan lo chuangkai leh der tawh mai !

 Kan BLOG pawh hi update lohin kum 2 vel zet chu a lo awm thip thep a, chutih lai chuan mi engemaw zat chuan in lo tlawh thin a lo ni a, a lawmawm viau laiin kan lo luah lum lo lutuk erawh kan inthiam lo hle mai. 

Kumin chu a khat tawkin update zeuh zeuh pawh han tum leh dawn ila a tha awm e. Chutih laiin Facebook leh Whatsapp lamah kan hunawl tam zawk chu kan hman tawh hlawm avangin Blog hian ngaihhlut a hlawh ta vak lo deuh niin a hriat a. Engpawh nise, a ngaihlu tu tan tal tangkai zawka chhawr theih tura chhawp chhuah kan han tum hram hram dawn a ni.

Kan Blog hi KTP lama active taka kan inhman ve laia siam a nih avangin a tirlamah chuan a KTP viau mai a. Tunah erawh KTP lam hian an maintain chhunzawm tak em em lohah chuan tlemin han ti Kohhran leh deuh ila tihna rilru te a lo awm deuh a. Chuvangin update vak loh pawha tangkai thei tur leh lo len luh manhla deuh tura chhawp chhuah sak dan che u hi kan zawn a ngai ta deuh a ni.

Khawvel thiamna sang zel hian min vawrh leng lawp lawp mai a, hei vang hian thil awlsam theih dan kan ngaihtuahin kan intihhmuh nasa em em a. Kan nun pawh a nghawng nasa hlawm viau awm e. Hetih lai hian danglam ve ngai lo kan Lalpa-ah hian kan innghah tlat hi ava pawimawh tehlul em! Duhtak te u, Khawvel hi hmangaih suh ula, khawvela thil awm te pawh hi hmangaih hek suh u. Miin khawvel hi a hmangaih chuan Pa a hmangaihna amahah a awm lo. Khawvel hi a chakna te chawpin a boral mek a ni. Khawvela thil awm, mit chakna te, tisa chakna te, damchhung ropuina lem te hi Paa chhuak a ni lova khawvela chhuak a ni zawk si a. He thu hi a rintlak em em a ni. 

Tunlai Khawvel-ah hian kan ngaihtuahna hruai bo thei tu a va tam ta em! Lei lama thil awmah te kan rilru nghahna tur a tam em em lai hian CVhunglama kan rilrute nghat zawk turin kan Lalpa hian min zirtir a, chuvangin KUM 2018 KAN LO THLEN HIAN kan Pathian lam hawiin kan rinna hmasa lamah khan i kir leh ang u. Zan hi a ral lek lek tawh a khua a var dawn tak hi.

Lalpa'n malsawm che rawh se.