KOHHRAN CHANCHIN

VAIVAKAWN PRESBYTERIAN KOHHRAN
CHANCHIN

A tobul :

Vaivakawn Presbyterian Kohhran hi Dawrpui Vengthar Kohhran atanga indang a nih avangin sawi kual deuh a ngai a. Kum 1956 khan Dawrpui Kohhran atangin Dawrpui Vengthar Kohhran hi a indang a. Vaivakawna awmho pawh an lawi nghal vek a, khawtlang inrelbawlna lamah chuan Vaivakawn VC huam chhung vek an ni thung. District Council atangin Primary School hmun pass an dil a, hemi rual hian Biak In hmun tur pawh an dil tel ve nghal a, pek an ni nghal bawk. Kohhran Indan chungchang : Vaivakawna Presbyterian Kohhran din tura hmalakna hi kum 1964 atang daiha intan a ni a. Hetia veng hran ni si a, Kohhran pakhat lawi reng si chu harsatna leh buaithlakna tam tak a lo awm a, Vaivakawn a awmte chuan Kohhran indan zai an rel ta thuai a.  April  28, 1964 ah Vaivakawn Paho, Kohhran Dan zawhkim zawng zawngte chuan  Biak Ina neih dan tur relin Pu Patea Inah an inhmu khawm a, hetah hian Biak In neih a, Kohhran indan an duhthu sawiho a ni. Amaherawhchu, hetih lai hian Kohhran Puiah Biak In sak mek a nih avangin an nawr chhunzawm ta lem lo va. May 15, 1964-ah Pu K. Chaldailova Inah an sawi ho leh a.  A kum leh, February 1, 1965-ah an sawi ho leh a; mahse, Biak In sak zawh hmaa inla hrang zawnga thiltih chu a tha lo ve tiin an ngawihsan leh a.Rambuaiin a nang zui a, engmah ngaihtuah theih a ni ta lo va. December 17, 1970(Ningani) zanah inhmukhawm lehin Kohhran din tha an ti tlang a, Committee-a thlen turin thu an titlu ta a.

Dawrpui Vengthar Kohhran Committee chuan January  7, 1971 zanah Vaivakawn paho inhmu khawm thu chu an ngaihtuah a, ngun taka vawi li lai an ngaihtuah hnuin Vaivakawn inkhawm hran dilna(preaching station neih) chu an remti ta a. Preaching Station Committee te  siamin inkhawm hrang turin hma a la zui ta a. Preaching Station kaihruaitu atan hian Upa R.Zobela ruat nghal a ni a, hetih laia Vaivakawn lama awm, D.Vengthar Upa- Upa K. Chaldailova leh Upa Laihnuna te chu Kohhran pui indaih lohna avangin Upa an neih belh hma chu Vengthar lam lawi turin an ti thung a. Tichuan, Inkhawm hranna hmasa ber chu February 3, 1971 (Nilaini) zanah L.P. School, Vaivakawnah neih a ni a, thawhlawm pawh Rs.20.28p lak khawm a ni. Hemi kum vek(1971) hian Vaivakawn Preaching Station chu Chhimthlang Presbytery chuan Kohhran puitlinga siam a remtih angin November 28, 1971-ah Vaivakawn Kohhran chu Kohhran Puitling ah hlan kai a lo ni ta a, indantute chu Rev C.Ronghinga leh Upa Lalhrangluaia te an ni.

Hemi ni atang hian Vaivakawn Presbyterian Kohhran chuan member pun lamah leh rawngbawlna kawng tinrengah zawi zawiin hma a sawn zel a. Tun thleng hian he Kohhran atanga Kohhran indang pathum lai an awm tawh nghe nghe a ni. Vaivakawn Kohhran atanga Kohhran indang tate leh an indan hun chu hetiang a ni :

1.    Zotlang Kohhran    : July 8, 1983

2.    Kanan Kohhran    : February 22, 1989

3.    Hunthar Kohhran    : January 4, 1990

Kum 1992-a Synod Inkhawmpui chuan Pastor Bial thar hawn belh tur a tih zingah Vaivakawn Pastor Bial pawh a tel a, tichuan January 24, 1993-ah Bial hawn a niin RevRobawia chu Bialtu Pastor hmasa ber a ni. Kum 1996 khan Kohhran din kum 25-na (Silver Jubilee) chu ropui takin lawm a lo ni tawh bawk.

BIAK IN  1-NA  LEH 2-NA

CHANCHIN

- Malsawmliana

Kan hriat angin Vaivakawn Kohhran hi Dawrpui Vengthar Kohhran atanga indang a ni a. Kum 1964 vel atang khan  Vaivakawn lama awmhote chuan Kohhran indan huna mamawh tur tiin Biak In hmun neih dan turte an lo sawi ho fo tawh thin a.  Hemi rual hian Kohhran indan thu pawh an sawi thin bawk. Kum 1964 khan District Council atangin Biak In hmun tur an dil a, awlsam takin an hmu nghal mai a. Hetia a hmun tur a neih takah hian Pa-ho chuan Biak In sak nghal mai te an han rel leh thut thut thin a, Biak In sak chungchang rel hian tum engemaw zat an inhmu khawm nghe nghe a. Tichuan, a hmasa ber atan a hmun tur laiin May 25, 1964 zanah  hnatlang neih a ni a, hetah hian mi 19 an thawk chhuak a ni. Hemi hnu hian hma an la chhunzawm ta lo va, a kum leh February 1, 1965 zanah inhmukhawm lehin Biak In sak thu bawk an sawi ho leh a. Mahse, hetih lai hian Kohhran pui lamah Biak In sak mek  a nih avangin Kohhran pakhata lawi si, a hranga lo tih kha remchang lova hriat a nih avangin upate thu zawmin an ngawihsan leh ta a. Mizoram a lo buai tak avangin Kohhran indan leh Biak In sak lam pawh ngaihtuah hleih theih a ni ta lova. Hetih lai hian Vengthar Biak In pawh sak zawh a ni ta a.

Kohhran indan leh Biak In hmasa ber :
January 19, 1971-a Dawrpui Vengthar Kohhran Committee in Vaivakawn lam inkhawm hran an dilna chu a remtih hnuah February 3, 1971(Nilaini) zan atangin inkhawm hran
nghal a ni a. Kohhran Commitee pawh siam fel nghal a ni. Kohhran Committee pawhin Biak In sak ngaihtuah nghalin Building Committee a siam nghal a, member te chu –

1) Upa R. Zobela    

2) Upa K. Chaldailova

3) Upa Laihnuna
4) Pu Civilmawia

5) Pu Laibata

6) Pu Thanhnuna
7) Pu Hrima

8) Pu Thangphuta

9) Pu VL Muana
10) Pu C. Makliana

11) Pu Liandala

12) Pu Zatawna
13) Pu Zasanga

14) Pu P.Liankhuma

15) Pu Zawllala

16) Pu Zathangpuia
17) Pu Luaia

18) Pu Hranglianthanga
19) Pu R C Rokhuma

20) Pu Thangchungnunga

Building Committee te hian June 13, 1971 ah Committee hmasa ber neiin hma an la chho tan a. Biak In hmun tur dang melhin Pu Lalhuma ram leh Pu KT Siama ram te an en kual a, mahse Biak In hmun daih tur a awm theih loh avangin a hmun neihsaah chuan inbenbel an titlu a. Kum 1971 leh 1972 chho vel hian Biak In hmun laiin hnatlang tum eng emaw zat neih a ni a, Kohhran pui bakah KTP leh Kohhran Hmeichhia te pawhin anmahni pualin hnatlang an nei thin a, Dawrpui vengthar lam KTP te pawhin an laih pui thin bawk. Hetih chhung hian LP Sikul-ah inkhawm thin a ni. Sikul awmna leh Biak In hmun hi inthlengin Sikul Building thar chu Biak In hmun lamah sak a ni a, Kohhran suma sak a ni nghe nghe. Sikul hlui awmna lamah Biak In chu sak a ni ta a. A hnu deuhvaha Sawrkar atanga Sikul sakna pawisa Rs. 2,500 lo kal pawh chu Kohhranah chhun luh a ni ve thung a. December 18, 1972-ah Sikul thar sak zawh a ni a, hemi ni hian Sikul hlui zawk chu Biak In anga inkhawm theih tura chei nghal a ni a. Biak In chung tur Rangva (Alluminium) Bundle 12 (Rs.2,880.00) man lei a ni bawk. Sikul Building chu a vanglawi a thlang lam atanga luh a ni a, hei vang hian Pulpit pawh chhak lamah hun a ni a. Biak In anga chei a nih takah hian a dunglawiin siam a ni a, Pulpit pawh a awmna sawn a ni a, a pawn lam bang pawh ft 4 vela tihzauh a ni bawk. Biak In Pahnih-na Kohhran mipui an lo pung zel a, Sikul Building pawh chuan a zo lo ta ta hle a. Sikul  building chu sak hnanin Biak thar tur sak hna tan chhoh leh a ni a.Building Committee ten hma lain Kohhranhote pawh Biak In thar leh lian zawk sa turin an inbuatsaih a, Rora te chhuin tum eng emaw zat hnatlang an nei thin a ni. June 6, 1974-ah a ban tur Thir phanin hnatlang neih a ni a, foundation phumna tur leih lai pawh tan nghal a ni. July 13, 1974 chawhma dar 11-ah Biak In Pahnihna tur Lungphum chu Chhimthlang Presbytery Moderator Upa R. Rozinga’n  phum. Biak In tur hi Upa R. Zobela’n uluk takin a lem nen ruahmanna a siam a, kum 5 chhunga zawh hman tura ruahman a ni. A chung chhawrdawh awm ve tho si, a chung zawl tura ruahman a ni nghe nghe.  Tluang takin sak chhoh zel a ni a, a chung (roof) thu ah chuan a tira ruahman angin sak a ni ta lo. A chhan chu,  hetih lai hian Biak In chung zawl hmang an la awm lo va, tihdanglam duhna a lo awm a. KTP lamin a hnuaia mi ang hian ruahmanna siamin Kohhran Committee-ah an thlen a, hetiangin :

a) A chung pianhmangah chuan a chung awih chhawng ni se;
b) A chung atan AC Sheet (Asbestos Cement Sheet) hman ni se.

February 3, 1978 zana Kohhran Committee chuan thalai lam rawtna ang hian ‘kan tlin tawk, tha tho sia sak ni se’ tiin an rel a. August 22, 1978-ah a chung tur AC Sheet (feet 9 a sei phek 34 leh ft 6 chi phek 68) a lo thleng a, chih nghal a ni. September 2, 1978-ah a chung chih zawh a ni. Inkhawm theih turin Biak In chu peih a ni a, mahse hna thawh tur erawh a la tam hle. Hetia Inkhawm theih a lo nih takah hian luah tura inbuatsaih a ni a, a chhungkhung a awm Sikul hlui chu thiah tura ruahman a ni a. Tichuan, October 10, 1978 (Nilaini) ah Sikul hlui chu thiah hnatlang neih pahin Biak In thar hlanna hun hman nghal a ni a. A hlanna ah hian mi dang sawm lem lovin hnatlang neih nghal tur a nih vangin tualchhung mi, a thei thei sawm an ni a. Zing dar 9:30-ah Biak In tualah Kohhranhote kal khawmin dar 10:00-ah a chhungah lutin Upa R. Zobela’n Pathian hnenah Biak In thar (Biak In atan liau liauva sak hmasak ber) hlanna hun a hmang ta a ni. He hunah hian Pathian hnena lawmthu sawina hun hman a ni bawk a, Secretary in Report tawi a pe a, a tlangpuite -

a)  He kan Biak In min dinpuitu Upa Laihnuna chuan chatuan ram min pansan ta a, kan ngaiin a lunglenthlak hle.
b) Upa Chaldailova pawh, thahnemngai taka kan lo thawhpui a ni a, min lo pemsan ta a, kan ngai hle a ni.
c) Sikula kan inkhawm chhung khan Upa 2 thlan tlin kan nei a, Upa Laibata leh C. Makliana.

A hlanna inkhawm neih a nih hnu hian chawhnu lamah a chhuat laih rual leh Pulpit sawn luh hnate an thawk. Hetianga Biak In thar hlanna neih a nih avang hian a hranpain Biak In thar hi a hawnna inkhawm buatsaih a ni lo. Biak In 2-na hi luah chung rengin a tihzauh hna te thawh chhoh reng a ni a. Hawn a nih hnu pawh hian hna thawh chhunzawm zel a ni a, Biak In hlui hmanruate pawh a theih ang angin hralh a ni a, Rs. 782 hmuh a ni. A chhuat pawh August 28, 1979-ah cement-a chhun a ni a, a kum leh(1980)-ah Vestry zawh fel a ni a, Biak In thara inkhawmpui thlen hmasak ber turin January thlaah Bial KTP Conference thlen a ni.Biak In thara hun turin Pulpit thar siamtir a ni a, Upa Laibata leh Mistiri Lalhmuakaten an siam a, February 28-ah hun luh a ni.Kum 1982-83 chho vel hian Biak In kawt tihzauh hna bakah thlang lam leh chhak lam lungrem hnate thawh a ni a, nasa takin Biak In sakah hna thawh a ni. Kum 1984-86 chho velah chuan tha thlah deuh a ni thung. Kum 1987-ah a ‘nak pang’ pakhata siam a ni a, ceiling pawh siam nghal a ni. Hun lo kal zelah Kohhran dangte pawhin Gallery siam an uar chhoh tak zel avangin thlang lam, chhak lam leh hma lamah Gallery-te siam a ni a. Thlalaka kan hmuh ang hian a  hmai lam te sak that a ni a, mahse, sak zawh tak tak a nih hmain Kohhran Committee chuan thiaha a thar hlaka sak that an rel ta a. Tichuan Biak In 2-na chu February 10, 2003 thleng luah a ni.

Biak In thar

- Upa R. Hmingthanzuala

Treasurer, Building Committee

“ Hmun thianglim min siam sak rawh u, In zinga ka chen ve theihnan’ Sipaihote Lalpa chuan a ti.”

Vaivakawn Biak In thar sak hi kum 2001 a\ang khan rel tan a ni a. Tichuan, Kohhran Committee in a lo rel tawh angin Biak In hman lai chu \hiah veka a thar hlaka sak that turin ruahmanna siam chhoh a ni a.Building Special Ip te siamin Kohhran In tin te Budget insiam a ni a. Tichuan, November 28, 2001(Nilaini) zingah (kan Kohhran kum 30 tlinna champha ni bawk) Biak In sak lungphum chu Rev C. Lianzuala, Bialtu Pastor in a phum a. Biak In sakna tur senso tur pawh chhut lawkin Rs. 82.00 lakhs vel ruahman a ni. Biak In sak chhung hian Building Committee vawi 39 leh Sub-Committee vawi 3 thut a ni. Committee Chairman atan mi 2 -Upa Liantusanga leh Upa Lalhluna te kan nei hman a, Supervisor pawh 4 kan nei hman bawk, chungte chu - Upa Liantusanga, Pu K.Sangzuala, Pu R. Zothanmawia leh Pu Saihmingliana Sailo. A sak dan tur ruahman tur hian rchitect David Guite, Chanmari West hman a ni a, Structural Engineer chu Er. Lalthanzuala a ni. Biak In lenzawng hi a dung 80ft leh avang 60ft (80x60ft) a ni. Kan Biak In hi a hmun a rem loh em avangin a hnuai lam ban phunte a harsa em em a. Kum 2001 leh 2002 chhung zawng chu a hnuai lam khawih nan hman a ni a, a kawt zawl pawh hi mimal Dawr chung dilin annin phal taka min hmantir avangin an chungah kan lawm hle a ni. February 10, 2003 -ah Biak In hlui chu thiah a ni a, Gospel Centenary Hall-ah inkhawm tan a ni. Hemi kum atang hian Biak In sak hna chu ngawrh leh zualin kal pui a ni. Hall-ah hian kum khat leh a chanve vel kan inkhawm hnuah  August 8, 2004(Inrinni ) -ah Biak In thar hnuai chu Inkhawm nana buatsaih peih a nih tak avangin Inkhawm nan hman leh a ni.

Hnatlang :

Biak In saknaah hian Kohhran mipuite kan tangrual tha hle a. Ban khur laih pawh Upa Bial ah laih tur pawtin kan insem vek a. Ban khur zawng zawng hi hnatlanga laih deuh vek a ni.Hnatlang neih zat hetiang hi a ni : a) Nileng hnatlang vawi 137 (tha 6,800 vel)  b) Zingkar hnatlang vawi 134  c) Zan hnatlang vawi 120

Building dang sak :
Biak In sak chhung hian kum 2004 khan KTP Golden Jubilee Building sak a ni a, kum 2005-ah Kohhran Hmeichhe Centenary Building chu Gospel Centenary Hall hnung lamah
sak a ni leh bawk. Heng Building pahnihte hi Kohhranin kan tangkaipui hle.

Biak In sakna sum : Biak In sak nan hian Bank Loan leh veng chhunga mi inphalte pahnih Pu H. Sangchhunga leh Pi Lalremmawii (Te-i)-te sum p<k a ni a, hei bakah hian Special Budget leh mi inphalte sum pek khawm hman a ni bawk. Kohhran mipuite kan tang rual a, a lawmawm hle.

Biak In sakna senso : Biak In sakna senso hi a tira chhut chhuah (Rs.80lakhs) ai chuan a sang ta deuh va, a chhan chu thil man ang zel bakah tum aia thaa kan sak tak vang a ni ber. A pumpuia senso zawng zawng belh khawm hi (Loan rulhna tel lovin) Rs. 1,04,48, 946.00 a ni. A hmanna tlangpuite chu :
1) Iron Rod leina            : Rs. 18,12,412.00
2) Cement leina                : Rs. 11,66,104.00
3) Rawra man                : Rs. 3,21,250.00
4) Balu man                : Rs. 3,90,450.00
5) Brick man                : Rs. 2,67,820.00
6) Steel Truss leina leh a siamna        : Rs. 2,57,525.00
7) GC Sheet Rangva leh a chihna    : Rs. 2,76,592.00
8) Ceiling Armstrong              : Rs. 6,56,480.00
9) Red Oxide, Rawng, Thinner leina     : Rs. 2,78,326.00
10) Marble ( a chhuat phah)         : Rs. 4,86,744.00
11) Electric bungrua( Lights etc.)     : Rs. 2,21,530.00
12) Architect Fees            : Rs. 1,65,000.00
13) Darthlalang                : Rs. 75,436.00
14) Duroturf Kawngkhar        : Rs. 62,400.00
15) Thingzai, Cubic Lung etc.        : Rs. 13,65,293.00
16) Pupit leh Maicham siamna        : Rs. 1,50,000.00
17) Sound system            : Rs. 2,84,500.00
18) Thuthleng siamna             : Rs. 55,060.00
19) Mistiri leh Labour hlawh        : Rs. 21,56,024.00
A vaiin                : Rs. 1,04,48,946.00

Pathian hruaina ropui tak mai changin Biak In thar kan hawng thei hi a lawmawm em em a. Kan Biak In hi Kohhranho zinga Lalpa a chen theihna tura sak a ni tih i hre reng ang u. Kan Biak In sak chhung zawnga thilpek petu te, sum min puktirtute, thahnemngai taka thawktute leh hnatlanga thawk chhuak thinte chungah lawmthu kan sawi a. Eng emaw changa veng chhunga Dawr neituten phal taka an bungruate min battir thin avangin an chungah lawmthu kan sawi bawk a ni. Ropuina leh chawimawina chu Lalpan chang zel rawh se.

- Source : Vaivakawn Biak In hawn Souvenir, 2007