BRANCH HISTORY

VAIVAKAWN BRANCH KTP

- An overview

Source: www.vaivakawn.in

Vaivakawn Branch KTP hi December 12, 1971-ah din a ni a. December 13, 1971 (Thawhtan) zanah a vawikhatna atan KTP inkhawm neih a ni. Chutih lai chuan Program Committee hran siam lovin Branch Secretary-in program a duang mai thin. Kum 1990 atangin vawiin thlengin program duang tur bik, program committee neih a ni. Branch din tirhah hian Pathianni zingkarah kohhran chhungkaw inah Tawngtai Inkhawm neih thin a ni a; tlai lamah a remchan dan angin Fellowship neih thin a ni bawk a. Hetiang hian kum 1976 thleng khan kalpui a ni. Kum 1976 atang khan Pathianni tlaiah Tawngtai Inkhawm (Fellowship an tih bawk) hi mumal taka neih a ni ta a ni.

Kohhran chhungkuaah chhiat tawk an awmin inkhawmpuina hun hman thin a ni a. He kalphung, tunthlenga kan la hman zui hi kum 1988 atang khan tihdan phung nghetah neih a ni.

Ramthar rawngbawlna lamah pawh Vaivakawn Branch KTP hian theihtawpin tha a thawh thin. Vawiin thlenga kan la tih thin, Faith Promise hi kum 1981 atanga bul tan a ni a. Heta tang hian Thawktu chawm a ni. Kum 1983 khan thawktu chawm bul tan a ni a. Vawi tam tak Ramthar field ah Work Camp neih a ni tawh.

Kum 1974 atangin Branch chu Group A B C D E-ah then a ni a. Kum 1977 atanga 1986 thleng khan Bible-a mihring hming chawiin Group hi then thin a ni a. Kum 1987 atangin tuna kan kalpui ang hian Group hmingah Mizo Missionary Marter te hming chawiin Group hi then a ni.

Vaivakawn Branch atang hian kan hriat angin Branch lian tak tak pathum, he’ng – Zotlang Branch (1983), Kanan Branch (1989) leh Hunthar Branch (1989) te hi a piang tawh.

Zaipawl rawngbawlna lama Vaivakawn Branch in sulhnu a neih tawhte hi sawi kim sen a ni lovang. Kohhran a dintirh khan Bialtu Pastor, Rev, Thansiama phei chuan “Vaivakawn Kohhran chu thalaite kohhran a ni” a tih hial khawpin Zaipawl leh rawngbawlna hrang hrangah thalaite an thawkrim a ni. Tualchhung kohhrana Zaipawlin rawngbawlna thahnem tak an neih mai piah lamah hian Bial huapa Zaipawl intihsiaknaah vawi tam tak lawmman pakhatna an la.

Kohhran Zaipawl chuah hi a ni lovin Kohhran Male Voice pawh nghet takin a ding thin.

Kan mi hmasate khan inpumkhatna leh thawhhona tha tak anlo neih thin chu an rawngbawlna tichaktu bulpui a ni a. Midangte pawhin thalaite zinga KTP tak hmuh tur an neih thin avangin kohhran thlengin a khaidingtu an ni.

Kum hnih-thum kal ta atang khan KTP rawngbawl hi a tlahniam ta viau nia ngai an awm ta. Inkhawmah phei chuan rampumah a tichhe zual zingah hriat kan hlawh ta a; Zaipawl rawngbawlna lah hruaitute tana mangan thlak khawpin kan thawm a reh ta mek.