TAN LAK NGAI

Chawhnu Inkhawm hi harsa kan ti ta hle mai...Sap kan anna lai tak a ni awm asin!!!

Hla zir hi  a KTP lai tak a ni a, kan va tlem thin em!!!!!

Thufing chuan 'Bul tan that hi a chanve zo ang a ni' a ti a. Tunah hian kum bul kan tan chho mek a, KTP member te pawh kan phur chho viau dawnin a lang a. Chutih lai mekin kan inpekna leh rawngbawlnaah tan kan lak thar a ngai hle mai. Biak Inpui Chawhnu inkhawm kan pung hlei thei meuh lova, Kohhran Zaipawl hla zir kan pan thei hle mai bawk. Theih tawp chhuah a va ngai tak em. Kristian kan nihna hi kawr (cover) atan chauh kan hman chuan a fuh dawn lova, kan thiltih apiangah theihtawp chhuah turin tan lak a ngai a ni.

Member thar lawm & Group Hruaitu thlan

January 31, 2011 (Thawhtan zan) Dar 6:30 khian Gospel Centenary Hall-ah Member thar lawmna leh Group Hruaitu Thar thlan Inkhawm neih tur a ni dawn a, Program hetiang a ni ang:
Chairman                        : Pu Alan Lalmuanpuia, Branch Leader
Tantu                              : Nl. Laldinpuii, Comt. Mem.
Thilpek lakhawmtu turte  : 1. Nl. Lalhlimpuii 2. Nl. Roluahpuii 3. Nl. Lalrempuii Sailo 4. Nl. Lalngaihzuali
Thilpek hlantu                  : Tv. Vanlalhriata Chhangte, Comt. Mem.
Member thar lawmna
& Inhmelhriattirna             : Pu Lalsaimawi Sailo, Branch Secretary
Thuchah Tawi                  : Tv. Lalchhuanawma Khiangte, Branch Asst. Leader

GROUP HRUAITU THLAN
Thlanpui tute                   : Branch Office Bearers
Group Hruaitu thlantharte
fuihna & Hlanna             : Pu Alan Lalmuanpuia, Branch Leader
Special Items                 : 1. Branch 2010 Review Vedio/Pics Show
                                       2. Solo - Guest Artist (Melody Zothansangi)
Zai hruaiturte                 : 1. Tv. Vanlalruata (i/c Khuang)
                                       2. Tv. Lalthlamuana (i/c Keyboard)
                                       3. Tv. Lalremthanga (i/c E-Drums)
                                       4. Tv. F. Zodingliana (i/c Bass G)
                                       5. Tv. R. Lalmalsawmhlua (i/c E-Guitar)

Hla hril tur                    : Nl. R. Lalmuankimi
Sound Duty                  : 1. Tv. F. Lalnuntluanga
                                      2. Tv. Vanlalpeka
                                      3. Tv. R. Zohmingliana

REFRESHMENT: Refreshment Sub-Committee

DECORATION: Decoration Sub-Committee

BIAL KTP CONFERENCE TIAK TA

Vaivakawn Pastor Bial KTP Conference vawi 19-na Rangvamual Kohhran Biakina neih chu January 23, 2011 Pathianni zan khan tluang takin a tiak ta. He Khawmpuiah hian “Pathian hnaih hi a tha a ni” tih thupui Rev. H. Zothansanga, Director, Presbyterian Family Guidance and Counselling Centre-a mi sawi ngaihthlak thin a ni a. Thlengtu Kohhran ten hneh takin Inrinni tlai leh Pathianni tlaiah Palaite ruai an hlui thin a, Thlarau lamah leh tisa lamah tlai leh puar takin Palaite an hrai tlai a ni. Rorel Palai hi mi 153-a chhiar a ni.

He khawmpuiah hian kum 2011 chhunga Bial hruaitu tur chu bialtu Pastor kaihhruainain Palai ten an thlang a, chung hruaitu thlan thar te chuan Pathianni chawhma inkhawm banah chanvo insiam rem nghal niin zanah Vaivakawn Pastor Bial Chairman Upa Liantusanga’n khunkhan takin Pathian hnena hlanin a tawngtai sak. Kum 2011 chhunga Vaivakawn Pastor Bial KTP hruaitu tura thlanchhuah te chu hengte hi an ni:-

Leader                         : Tv V. Lalrinmawia (Hunthar Branch)

Assistant Leader         : T/Upa Lalremsanga (Rangvamual Branch)

Secretary                     : Tv. Lalruatkima (Vaivakawn Branch)

Assistant Secretary     : Pu Vardingliana (Phunchawng Branch)

Treasurer                     : Pu Alan Lalmuanpuia (Vaivakawn Branch)

Finance Secretary        :Tv. Zodinthara (Hunthar Branch)

Heng mi paruk thlanchhuah bakah hian Bial Committee Member tur member 14 siam nghal a ni a, chungte chu:-

Vaivakawn Branch atangin:

1. Tv. Lalchhuanawma Khiangte
2. Pu Lalsaimawia Sailo
3. Pu Laltanpuia Chawngthu
4. Pu Johny Rosailova

Hunthar Branch atangin:

1. Pu A. Laltinkima
2. Pu K. Lalbiakkima
3. Pu Lalbiakmawia
4. Tv. VL. Malsawma Renthlei

Rangvamual Branch atangin:

1. Tv. El-Bethela
2. Tv. Noel Lalvohbika
3. Tv. Joseph Rokhuma

Phunchawng Branch atangin:

1. Pu F. Rorelliana
2. Pu Lalthangpuia
3. Tv. Lalpekmuana

Heng bakah hian Bialtu Pastor, Pro Pastor leh Bial Standing Committee Chairman te chu Ex-Officio member an nghal a ni.

Nakum 2012 Bial KTP Conference-na hmun tur chu Hunthar Kohhran-ah a ni ve thung anga a, speaker atan Upa Sanglianthanga, Tlangnuam a ni ang.

Vaivakawn Pastor Bial KTP Conference Rorel leh hruaitu thlan zawh a ni ta.

Vaivakawn Pastor Bial KTP Conference Vawi 19-na chu Rangvamual Kohhran Biak Inah hman mek a ni a. January 22, 2011 Inrinni chawhma dar 11:00 atanga 11:30 inkarah kum 2011 chhunga Bial KTP hruaitu tur thlanna bialtu Pastor hova neih a ni a. Biak KTP in nomination a siam mi 12 atangin mi 6 aruala thlan chhuah an ni a, chungte chu(Alphabet indawtin):-

1. Pu Alan Lalmuanpuia, Vaivakawn Branch

2. Tv. Lalruatkima, Vaivakawn Branch

3. T/Upa Lalremsanga, Rangvamual Branch

4. Pu Vardingliana, Phunchawng Branch

5. Tv. V. Lalrinmawia, Hunthar Branch

6. Tv. Zodinthara, Hunthar Branch

Kuminah hian Bial KTP OB tanglai pahnih (Upa Lalduhawma leh Pu CVL Tlanhlua) kum lama an over tak avangin Bial OB-ah hian hmel thar pahnih kan hmu a, chungte chu Pu. Alan Lalmuanpuia leh T/Upa Lalremsanga te an ni, a dangte erawh chu bial hruaitu ngai thlannawn leh te an ni hlawm. Heng hruaitu thlan tharte hi Pathianni zan inkhawmah Vaivakawn Pastor Bial Chariman Upa Liantusanga'n Pathian hnena hlanna a nei dawh a ni.

He khawmpuiah hian General Agenda 6 ngaihtuah tura chhawp chhuah a ni a, chungte chu hetiang hian rel a ni:-
1. Central KTP-in Mizorama HIV/AIDS darh zel tur venna kawngah chak zawka hma lak rawtna Vaivakawn Br.atanga lut chu ngun taka ngaihtuah a nih hnuah CKTP-ah thehluh nise tih a ni.

2. Kum 2011 chhunga Biak KTP member Bible chhiarchhuak te Bial KTP-in lawmpuina pek rawt.Vaivakawn Br & Hunthar Br. atanga lut chu sawiho a nih hnuah tihhlawhtlin ngei nise tih a ni.

 

3. Kan ramah pawngsual a hluar zel loh nan Central KTP-in a theih angin hma lak rawtna Hunthar Br. atanga lut chu a lo luh ang hian CKTP-ah thlen nise tia dah a ni.

 

4. Bial huapin Advance Krismas hman rawtna Phunchawng & Hunthar Br. atang lut chu tha tih a ni a, tihhlawhtlin ngei nise tih a ni.

5. Zirnaa hma kan sawn lehzual theih nan Central KTP-in hma lak rawtn Hunthar Br. atanga lut chu rei fe  sawiho a nih hnuah sawihona chu a thawk mai e tih a ni.

6. Bial huapin Leadership Training neih rawtna Rangvamual Br atanga lut chu sawiho a nih hnuah neih ngei nise tia dah a ni.

Rorel leh Hruaitu thar thlan zawh fel a ni hian tlaiah zanriah thlengtu Brangch-in an lo buatsaih chu Palai ten tlai leh puar takin an kilho.

 Inrinni zan atng hian thupui "Pathian hnaih hi a tha a ni" (Sam 73:28) tih chu Rev. H. Zothansanga, Director Synod Family Guidance & Counselling Centre in a sawi tan ta a, a ngaihthlak nawm hle. Inkhawm banah YMA Hall-ah Fellowship neih a ni a, Special item mit leh beng ti tlai tak nen  kham lo takin Inrinni Program te chu zawh fel a ni ta a ni.

Zai tinuamtute, thiamtakin zai an rem!

Fellowship-ah hi chuan lam vak mai tur....

Bial hruaitu over tur ten over takin solfa nen an vai liam

Bial Puipa te pawhin rorel nuam an ti...Synod riauin an hria

Bial Zaipawl Uniform ha lovin an zai thei tho!!

Fellowship Hall...tumah inhawsan loh tur....

A lo mak thei ngei mai.....(Hunthar Branch an che)

Mawng bel, solfa vai nan a tha.....

Minute lo ngaithla ru lem......Asst Secy

Palai chhiar hi vai thut hmak hmak tur!!!!!!

Phunchawng Zaipawl hian an theih tawpin Pathian an fak

"Petrol man nei zo lo chuan nula Date loh tur"

Hrehawmnaa lawm

HREHAWMNAA LAWM

- Alan Muanpuia

Bible: Rom 5: 1-4;  II Kor. 12:7-9

Rom 5:1-4 Chuvangin rinna avanga thiam changa awmin, kan Lalpa Isua Krista avangin Pathian nen inremin i awm ang u; ²amah avang vek chuan he khawngaihna kan din nghehnaah hian rinnain kan lut ta a; Pathian ropuina beiseiin lawmin i awm bawk ang u. ³Tin, chuti chauh chu ni lovin, kan hrehawmnaah pawh lawmin i awm ang u, hrehawmna chuan chhelna a siam a, ⁴chhelna chuan hriatfiahna a siam a, hriatfiahna chuan beiseina a siam tih kan hre si a.

IIKor.12:7-9 Tin, hriattirnate chu a nasat em em avanga ka inngaihhlut lutuk loh nan tisaah hling mi pe a ni, Setana tirhkoh kut thak hnawih nana mi hmangtu tur chu; chutilochuan ka inngaihlu lutuk dah ang e. ⁸Chu mi chungchang thu-ah chuan mi kiansan theih nan Lalpa chu vawi thum ka dil a. ⁹Tin, ani chuan ka hnenah, “Ka khawngaihna i tan a tawk e; ka thiltihtheihna hi chak lohnaah asin tihfamkimin a awm ni,” a ti ta a. Chutichuan Krista          thiltihtheihna chu ka chunga a awm theih nan lawm em emin ka chak lohnate               hi ka chhuang tawh zawk ang

1. Kan Bible-in HREHAWMNA a sawi dan

Thuthlung Hluiah vawi 30 aia tlem lo leh Thuthlung Tharah vawi 18 aia tlemlo kan hmu bawk a.  Hrehawmna hian mihring nun a ti nuam lo thei hle mai a. Bibleah pawh hian he thumal hian awmzia a nei thuk thei viau a ni. Hrehawmna hi chautan hrehawmna nen pawh sawi zawm a ni fo thin. Hrehawmna sawi a nih reng reng hian thil namai lo tak kawka sawi a ni deuh zel. 

2. Tunge hrehawmna tawk thin?

Naupang atanga puitling leh tar thleng pawh hian hrehawmna hian kan nunah min rawn luhkhung fo thin a.  Hrehawmna a lo thlen hian harsatnain min tlakbuak thin a ni. Chuvangin harsatna leh hrehawmna hi unau tih mai awm pawh a ni awm e.

3. Hrehawmna chi hrang hrang te.

Kan nuna hrehawmna a lo awm chhan tlangpui nithei te lo tarlang ila.

i)                    A hmasa berah chuan keimahni zir loh vanga kan siam chhuah ti ila a dik thei awm e. Kan tih tur kan tih loh avang te leh kan nih tur ang kan nih loh avanga kan nuna hrehawmna lo thleng ta hi sawi tur a tam hle ani. Pathian kan hnaih peih tawk loh avangin kan thlarau nun a lo pachhia a, harsatna hian min lo bawm ta luai luai thin a ni. Kan cho chhuah reng vanga hrehawmna lo thleng hi a tam hle ani.

ii)                  A dawtah chuan kan hriat phak loh hrehawmna in min lo tlakbuak ve reng hi a awm bawk a. Hei hi chu kan thu a ni hauh lo mai a, Pathian remruatna leh khawvel pian ken ve reng a nit e pawh ti ila a dik thei tho awm e. Kan tih theih piahlam a nih thin a avngin hetiang harsatnain min tlakbuak hia a hrehawmin a lungngahih thlak zual bike m em thin a ni.

Heng hrehawmna kan han sawi chi hnih atang hian  zir tur kan neih chu – Hrehawm kan tawrh hi kan Lalpa hian a phal a, keimahni cho chhuah a ni emaw Pathian remruatna kan chunga a lo thleng a ni emaw eng pawh nise hrehawmna atang hian thil pawimawh tak min zirtir a duh fo thin a, Ringtute chuan a thlawnin heng hrehawmna hi kan tur tur a nil ova, Pathian hnaih nan leh ama lam hawi nan kan hman a duh thin ani. Tirhkoh Paula pawh khan harsatna enemaw tak a taksaah khan a nei a, Pathian hnenah lak kian sak turin vawi thum ngawt a dil a, mahse Pathian chhanna chu, “Ka khawngaihna I tan a tawk…” tih a nit lat mai. Paula khan Pathian chhanna kha a pawm thlap mai a, a ropui hle a ni.  Chaklo nia a in ngaih kha a chakna hnar a lo nit a tlat zawk a ni.

4. Hrehawmna engtia hmachhawn tur nge ?

Hrehawmna kan hmachhawn dan hi a pawimawh hle mai. Tute pawhin kan tawk vek a, kan la tawk vek dawn a, kan lo inbuatsaih lawk thiam hi a ngai em em a ni. Hrehawmna liantham han tawh hi kan zo lo duh khawp mai a, ringtu puitling tak tak te pawh hian kan chauh phah fo ve bawk a ni. Chuvangin thiam taka kan hmachhawn theih nan lo inbuatsaih lawk hi kan tih makmawh a ni awm e. Tehkhin thu  pakhat han sawi ila. Lal pakhat hian a khawnbawl up ate zinga mi pahnih chu a ko a. pakhat hnenah chuan a ram chhunga kal chhuak veka, mi sual ber pakhat rawn thlang chhuak turin a ti a. Pakhat zawk hnenah vethung chuan mi fel tak pakhat rawn thlang chhuak turin a ti vet hung a. Tichuan an pahnih chuan a hrang v eve in an kal ta a,. Hun engemaw chen hnuah chuan mi sual zawng tura chhuak zawk chu a lo haw ta a, ani chuan Lalpa bulah chuan a ramchhunga mite chu uluk takin a tlawh chhuah thu leh a rama mipui te chuan dan leh thupek an zawm that thu leh an inlungrualin an hlim em em thu te leh tumah mi sual a hmuh zawh loh thu a sawi ta a.  A hnuahchuan Mi fel zawngtu pawh chu a lo thleng ve ta a, ani erawh chuan mi fel a hmuh zawh loh thu leh a ram chhunga mite chu hmangaihna nei lo leh duham taka khawsa leh midang aia mahni tha zawka inngai te hlir an nih thu a rawn sawi ve thung .

He thawnthu atang hian keimahni lam kan pawimawh zia a lang thei awm e. Thenkhat chu mahni inen hauh lova midang diklohna hmu thei em em an awm tlat mai a, mite thatna aia an thatlohna hmu thei riau nih ai chuan mite thatna hmuhsak thei tu nih hi a thlenawm zawk em em a. Chutiang tura kan inzir pawh angai awm e.

Chutiang chuah chuan hrehawmna kan hmachhawn dan pawh hi a mi a zir hian a inang lo thei hle a ni. Sawtpuina tana hman tum hi Baible min dud an leh zirtir dan pawh a ni.

Pathianin min kik harh nan hmanruah a hmang thin a, chuvangin kan lo muhil tawh emaw kan lo kal dik tawh lo emaw pawh a ni maithei mahni lam kan inen vat a, hemi avang hian Lalpa ka hnaih a ngai a nih hi tia, Lalpa lam hawi nana kan hman chuan kan tan malsawmna a lo ni dawn a ni.

5. Hrehawmna a lawm.

A chunga kan han tarlan tak ang khian ringtute chuan kan chunga hrehawmna lo thleng hi kan ngai thei anih hlauh chuan kan tan a lawmawm em em dawn a, hrehawmna kan tawh pawhin lawmin kan tuar thei dawn a lo ni a, Tirhkoh Paula pawh-in hetiang hian a lo tur tawh tih hi I zir chhuak ang u.

Lalpa’n a thu malsawm rawh se. A M E N!

Kumthar Thuchah

KUMTHAR THUCHAH

Alan Lalmuanpuia

Leader

Vaivakawn Branch KTP

Pathian hruaina leh awmpuina duhawm tak dawngin kum 2010 chu kan lo hmang zo ta der mai a, Kumthar lawmawm tak Pathian hruainain kan lo thleng leh ta reng mai. Kum thar hmangtu zawng zawngte kan Lalpa Isua Krista hmingin chibai ka buk a che u.

Tunlai khawvelah hian Pathian a beiseina nghah a, rin ngam loh a awl ta hle mai. Pathian chauh ringa beisei hi a tawk zo dawn lova rinna leh hlauhna hi mi tam tak in kan nei ta niin a hriat a. Amaherawh chu harsatna chi hrang hrang tawk ten Pathian an beisei a an lo hlawhtling tawh thin ang khan vawiin ah pawh hian Pathianah hian beisei tur a la awm a ni tih i hre thar ang u.

Beiseina hi mihringte nun hruaitu leh mihringte nun innghahna a ni tia sawi theih a ni awm e. Kan nitin awmdan awmze neih tirtu leh kan khawsak phung mi siam saktu bulpui ber a ni. Khawvela kan beiseina kan nghah changa a lo hlawhchham hian kan lungawi lova kan buai thin a, kan phunnawi a; kan beidawng thin a ni. Amaherawhchu Pathian chu a thutiamah a dingnghet a, a rinawm a, a tih tur chu a ti zel thin. Chuvangin ‘Pathian beisei rawh’ tih hi tunlai khawvel dinhmun harsa takah hian thu pawimawh ber angah a ngaih theih ang.

Mi thenkhat chuan sualna leh harsatna kan tawh hian Pathian atanga hla taka awm angah kan in ngai a, Pathian mit hmuha kan tih loh tur kan tih chang te hian Pathian lakah kan inthlahrung thin a. Pathian han beisei leh ngam tur ni pawhin kan in hre lo hial thin a ni. Amaherawhchu, Pathian thu atang chuan harsatna tawk te, misual te, dinhmun chhia te, Pathian mit hmuha tling tawh lo a inngai te tan beiseina hi siam a ni zawk a ni tih hi i hre thar leh ang u.

He kum tharah hian eng natna emaw avangin dinhmun khirh taka dingin i lo chuangkai ve a ni mai thei e, Pathian beisei rawh. Mahni sualna avanga lungngai tam tak kan awm a, misualte avanga lungngaite kan awm a ni thei. Amahah chuan beisei tur a awm a ni. Pathianin tihngaihna a hriat loh khawpa harsa hi a awm lo ve. Chuvangin pathian beisei rawh.

Tunlai khawvela kan rilrua lian ber pakhat chu hausakna sum leh pai te hi a ni. Hausak kan tum luat avangin thil dik lo tih te hi malsawmna dawnna emaw kan ti ta hial niin a lang. Pathian ai mahin tute zarzo thei nih emaw te hi malsawmna hnar zawk ni hiala ngaih te pawh kan awm a ni mai thei e. Mahse Pathian thu hi han en ila Pathian zar chauh zo tumte hi an mualpho bik love.

Hebrai sal tlangval Daniala leh a thiante pathum chanchin kan chhiar a. Lalpa duh loh zawnga in tih hmelthat emaw in tih hmel mawi emaw, in tih fin emaw chu anni chuan thain an ring lova, chumi chu tih loh an tum tlat a, kan chhiar zel chuan midangte aiin an hmel te chu a lo thain a lo mawi ta zawk a ni tih kan hria. Pathian kan beisei a, amaha kan innghah a, amah kan rin hian kan mualpho dawn emaw i ti lovang u. Kan mamawh zawng zawng awmna chu amah Pathian hi a ni zawk.

He kum tharah hian beidawng lovin chu Pathian chu beiseiin kum a thar ang hian chu beiseina eng min petu Lalpa chu i bel ang u. Sam ziaktuin “Aw ka nunna, engahnge i kun reng? Engahnge ka chhungah hian i buai reng ni? Pathian beisei rawh;” a tih ang khan Pathian beiseina thar nen he kum thar hi i hmang ang u.

Vaivakawn Pastor Bial KTP Conference 2011

Vaivakawn Pastor Bial KTP Conference Vawi 19-na chu January 21-23, 2011 hian Rangvamual Kohhran Biak Inah hman a ni dawn. Thupui atan "Pathian hnaih hi a tha a ni" (Sam 73:28) chu thlan niin Rev. H. Zothansanga, Director Synod Family Guidance & Counselling Centre chu Speaker a hmangin thupui hi inkhawm tum li-ah a sawi ang. He khawmpuiah hian General Agenda 6 ngaihtuah tura chhawp chhuah a ni a, chungte chu:-
1. Central KTP-in Mizorama HIV/AIDS darh zel tur venna kawngah chak zawkin hma lak rawtna. - Vaivakawn Br.atanga lut

2. Kum 2011 chhunga Biak KTP member Bible chhiarchhuak te Bial KTP-in lawmpuina pek rawtna. - Vaivakawn Nr & Hunthar Br. atanga lut.
3. Kan ramah pawngsual a hluar zel loh nan Central KTP-in a theih angin hma lak rawtna. -Hunthar Br. atanga lut.
4. Bial huapin Advance Krismas hman rawtna. - Phunchang Br. atang lut
5. Zirnaa hma kan sawn lehzual theih nan Central KTP-in hma lak rawtna. Hunthar Br. atanga lut.
6. Bial huapin Leadership Training neih rawtna. - Rangvamual Br atanga lut.

KOHHRAN CHANCHIN

VAIVAKAWN PRESBYTERIAN KOHHRAN
CHANCHIN

A tobul :

Vaivakawn Presbyterian Kohhran hi Dawrpui Vengthar Kohhran atanga indang a nih avangin sawi kual deuh a ngai a. Kum 1956 khan Dawrpui Kohhran atangin Dawrpui Vengthar Kohhran hi a indang a. Vaivakawna awmho pawh an lawi nghal vek a, khawtlang inrelbawlna lamah chuan Vaivakawn VC huam chhung vek an ni thung. District Council atangin Primary School hmun pass an dil a, hemi rual hian Biak In hmun tur pawh an dil tel ve nghal a, pek an ni nghal bawk. Kohhran Indan chungchang : Vaivakawna Presbyterian Kohhran din tura hmalakna hi kum 1964 atang daiha intan a ni a. Hetia veng hran ni si a, Kohhran pakhat lawi reng si chu harsatna leh buaithlakna tam tak a lo awm a, Vaivakawn a awmte chuan Kohhran indan zai an rel ta thuai a.  April  28, 1964 ah Vaivakawn Paho, Kohhran Dan zawhkim zawng zawngte chuan  Biak Ina neih dan tur relin Pu Patea Inah an inhmu khawm a, hetah hian Biak In neih a, Kohhran indan an duhthu sawiho a ni. Amaherawhchu, hetih lai hian Kohhran Puiah Biak In sak mek a nih avangin an nawr chhunzawm ta lem lo va. May 15, 1964-ah Pu K. Chaldailova Inah an sawi ho leh a.  A kum leh, February 1, 1965-ah an sawi ho leh a; mahse, Biak In sak zawh hmaa inla hrang zawnga thiltih chu a tha lo ve tiin an ngawihsan leh a.Rambuaiin a nang zui a, engmah ngaihtuah theih a ni ta lo va. December 17, 1970(Ningani) zanah inhmukhawm lehin Kohhran din tha an ti tlang a, Committee-a thlen turin thu an titlu ta a.

SYNOD STATISTICS REPORT (2009 - 2010)

SYNOD STATISTICS REPORT

(2009 - 2010)

   

Synod Statistics

.

.

KTP Member Group-ah then mek

Vaivakawn Branch KTP Member tun thlenga inpe tawh chu mi 553 an tling tawh. Kumin hian Group 4 ah bawk inthen a ni leh dawn a, Martar Lalsangliani Group, Martar Lalbiakchhungi Group, Martar Rohmingthangi Group leh Martar R. Lalrinngheta Group-ah te inthen leh turin Branch Committee chuan a rel a.

Member te hi Branch Office Bearer te chuan uluk takin Group-ah an then darh mek a, rualkhai thei ang ber leh inchawhpawlh tha thei ang ber turin uluk takin an then a. Zan hnih ngawrh takin an thawk tawh a ni. Zan hmasa zawk ah chuan 7:00pm ah tanin zing dar 4:00 an thleng a, a zan hnihnaah chuan 9:00 atanga tanin zanlai dar 12:15 thleng an bei leh a ni.

Hetiang taka uluka Member-te Group-a then an nih avang hian Kumin hian KTP thiltih leh chetvelna pawh a phurawm hle tura ngaih a ni. Group Member list hi Bial KTP Khawmpui tiak tuk zan Thalai Inkhawm hmasa bera en thei tura tarchhuah hman turin buatsaih mek a ni.

HLA ZIR TUR

Vaivakawn Branch KTP Member te kumin hian zaipawlah tan i la feuh teh ang u khai.
 Tunkar Zirtawp zan leh Pathianni chawhma hian Bial KTP Conference-ah hla kan rem dawn a, chumi atan chuan Ningani (Thursday) zan dar 6:30-ah G.C Hall-ah hla zir tur a ni a, kokim takin kal i tum ang u khai!!!

vvktp

WELCOME TO www.vvktp.blogspot.com

WELCOME TO www.vvktp.blogspot.com

WELCOME TO www.vvktp.blogspot.com

KOHHRAN THURIN

PRESBYTERIAN KOHHRAN THURIN SAWM

Thuhmahruai
India Ram Presbyterian Kohhran chuan (Apostol thurin te, Nicea thurin te, Westminster thurin leh Wales Ram Presbyterian Kohhran thurinte chu Pathian thu hrilhfiahna tha tawka ngai a, Kohhran tan leh Pathian thu zirna hmunahte zirtir tlak nia pawm tlat chungin), a hnuaia thurin puanchhuahna thute hi a Pastor te, Probationary Pastor-te, Upate leh Kohhran Dan zawhkimten an vawn ngheh tlat atan a pawm a ni.

THURIN - I

Thuthlung Hlui leh Thuthlung Thar Bute hi Pathian Thu a ni a, heng chauh hi rinna leh thiltih tehna dik lo thei lo a ni.

THURIN - II

Pathian pakhat chauh a awm a, Amah chauh chu biak tur a ni. Amah chu Thlarau, mahnia awm a, hmun tina awm, thlarau dang zawng zawng leh thil dang reng reng laka hrang si a ni a. A miziaah te, finnaah te, thiltihtheihnaah te, thianghlimnaah te, diknaah te, thatnaah te, taknaah te leh hmangaihnaah te tawp chin nei lo, chatuan mi, danglam ngai lo a ni.

THURIN - III

Pathianah chuan mi nung pathum, Pa leh Fapa leh Thlarau Thianghlim an awm a, an pathum hian Pathian pakhat an ni a, nihna thuhmun, thiltihtheihna leh ropuinaa intluk an ni.

THURIN - IV

Lei leh van leh a chhunga thil awm zawng zawng siamtu Pathian chuan mihring hi, hriatna, felna leh thianghlimnaa Ama anpuiin mipaah leh hmeichhiaah a siam a. Mi zawng zawng hi bul thuhmun leh chhungkaw khata unau anga inthui khawm vek kan ni.

THURIN - V

Mihringte chuan anmahni duh thu ngeiin Pathian dan an bawhchhia a, thiam lohna leh chhiatnaah chuan anmahni an inbarh lut ta a. Chu thiam lohna leh chhiatna leh sual hremna ata chu anmahni chhan chhuak tur leh chatuan nunna pe turin hmangaihna tawp nei lo Pathian chuan, A chatuan Fapa neih chhun Lal Isua Krista chu khawvelah a rawn tir a; Ama zarah chauh chuan mihringte hi chhandamin an awm thei a. Chu chatuan Fapa chu mihring takah a lo chang a, mi nung pakhat mize pahnih nei, Pathian tak leh mihring tak a ni kumkhua ta a ni. Thlarau Thianghlim thiltihtheihnain nula thianghlim Mari chuan a pai a, a hring a; mahse, sual a nei lo. Mi sualte tan Pathian dan chu a zawm famkim a, Pathianin dikna a phut hlen chhuak tur leh mihringte Pathian remtir turin, inthawina tak leh famkim atan a inhlan a, kraws-ah a thi a, phumin a awm a, ni thum niah mitthi zing ata a tho leh a. Pathian ding lamah a han chho va, chutah chuan a mite tan a dilsak reng a, chuta tang chuan mitthite kai tho tur leh khawvel rorel turin a lo kal leh ang.

THURIN - VI

Thlarau Thianghlim, Pa leh Fapa ata lo chhuak chuan mihringte chu chhandamna changtuah a siam a, an sualzia leh chungpikziate a hriat chiantir a. Krista hriatna kawngah an rilru a tivar a, an duhthlannate chawk thovin, Isua Krista chu an Lalpa leh Chhandamtua pawm tura ngenin, pawm thei turin a pui a, anmahniah felna rah chi tinreng a thawk chhuak thin.

THURIN - VII

Pathianin Kristaah chuan mi zawng zawng hnenah chhandamna famkim chu a thlawnin a rawn hlan a, an sualte simtir leh Lal Isua Krista chu an chhandamtu atana ring tur te, Amah entawn a, Pathian duh ang taka inngaitlawm leh thianghlima nung tur tein thu a pe a. Krista chu ringa, a thu zawmtute chu chhandam an ni a, sual ngaihdamna te, thiam chantirna te, Pathian fa nihna te, Thlarau Thianghlim chanpuina azara tihthianghlimna te, chatuan ropuina te an chang a. Ringtute chuan tun dam chhung pawhin chhandam nih inhriat chianna lawmawm tak chu an chang thei a. Thlarau Thianghlim chuan khawngaihna hna a thawhin, Thu te, Sakramen te, |awngtaina te hi hmanruaah a hmang deuh bik thin a ni.

THURIN - VIII

Krista din chhuah Sakramen-te chu Baptisma leh Lalpa Zanriah te hi an ni. Baptisma chu Pa leh Fapa leh Thlarau Thianghlim hminga tuia sil a ni. Hei hi Krista nena kan inzawmna te, Thlarau Thianghlim zara piantharna leh tihnunna chhinchhiahna leh nemnghehna a ni a, Lalpa hnena kan inhlanna thiltih a ni bawk. An sualte sim a, Krista chu an chhandamtu atan an ring tih puangtute leh an fate chantir tur a ni.
Lalpa Zanriah chu Krista thihna hriat reng nana chhang leh uain chan ho hi a ni a, ringtuten Krista thihnaa hlawkna an chan chhinchhiahna leh nemnghehna a ni. Ama mite chuan Amah leh a inhlanna an pawmzia te, an hlawkpuizia te, a rawngbawl tura an inpek zelna te, Amah an pawlna leh mi dang nena an inpawlna te entir nan, A lo kal leh hma loh chuan an chang ho thin tur a ni. Sakramen hlawknate chu Krista malsawmna avang leh rinnaa changtuah Thlarauvin a thawh avanga lo awm a ni.

THURIN - IX

Ringtu zawng zawng tih tur chu Kohhran inpawl honaa tel te, Krista Sakramen leh a thil serh dang vawn that te, A dan zawm te, tawngtai zel te, Lalpa Ni serh thianghlim te, Amah be ho tura inkhawm te, A thu hril ngun taka ngaihthlak te, Pathian malsawmna an dawn ang zela hlim taka pek ve thung te, anmahniho zingah leh mi zawng zawng zingah Krista nungchang ang tihlan te, khawvel puma Krista ram tizau tura beih te, ropui taka a lo kal lehna hun nghah te hi a ni.

THURIN - X

Ni hnuhnungah chuan mitthite chu kaihthawhin an awm ang a, mi zawng zawng Krista rorelna thutphah hmaah an lang ang a, he dam chhunga an thiltih that leh that loh ang zelin relsak an ni ang. Ringlote leh mi sualte chuan thiam loh changin an sual hremna an tuar ang; Krista ring a, a thu zawmtute erawh chu a langchanga thiam chantirin an awm ang a, ropuinaa lawm luhin an awm ang.

ENGLISH VERSION

SS ZIRLAI & NILAI THUPUI THLIRLAWKNA

August 28, 2011Sunday School Zirlai:

Tun Pathianni hian kan kohhranin Crusade kan neih  avangin Puitling Sunday School neih a ni lo anga, Rev. Lalrosiama ATC Lecturer-in Inrinni zan atanga Pathianni zan thleng hun a hmang ang. Kohhran hote inkhawm lamah thahnem I ngai ang u khai.

August 31, 2011 Nilai Zan Thupui:

Tunkar Nilaini hi Ramthar Ni a ni a, Nilai zan thupui hranpa siam a nil ova, Tualchhung Kohhran ten remchan dan agin hman tura tih a ni. Synod chuan hetiangin kaihhruaina a siam:

RAMTHAR NI (August thla ni hnuhnung ber)

Kum 1972 Synod Inkhâwmpui chuan August 31 hi Ramthar Ni atân hman thin ni se tiin a rêl a. A hman dân tûr hi Tualchhûng Kohhran remchân dân angin nilêngin emaw, inkhâwm vawi khat emaw neiin hman a ni thîn a. Tum khat inkhâwm atân chauh programme hi siam a ni a. Tum khat aia tam inkhâwm buatsaih theite chuan Tualchhûng Kohhran remchân dân anga programme siam belh theih a ni ang.

Thupui : Lal hna i thawk ang u

Chhiar tûr : Ezek. 3:4-9: Mat. 28:16-20; II Tim. 4:6

Thupui Then:

1. Chanchin Tha hril tûrin Lal Isuan min tîr

2. Lal Isua hi lei leh vâna lalber leh thuneitu a ni

3. A ngaithla duh lo hnênah pawh thu âwih taka hril tûr

4. Lal Isuan min awmpui reng a tiam

BEIHRUAL 2011:

Beihrual hi kan Kohhran mite thlarau lama intuai tharna hun pawimawh tak a ni. Mizoram hmâr chan hi Presbytery pakhat hnuaia kan la awm ho laiin Presbytery Inkhâwmpui rêl angin ram pumah Beihrual hi kum 1918 atang khân neih tan a ni a. A tîr lamah chuan ring lo, Pathian thu âwih lote ringtua siamna hun atân hman a ni deuh ber a. Ring thar pawh an pun phah hle a ni. Kum 1944-a Chanchin Tha Jubili lawm hnu lamah, Mizorama chêng tam zâwk ringtu kan lo nih tâk hnuah ring thar siam punna lam aiin, Kohhran sawh ngheh nân leh ringtute tihsâwtna lam hawia kalpui a lo ni ta a ni.

Kum 1918-a Hmunhmêltha khuaa Presbytery Inkhâwmpui neih tumin Beihrual hi September thlaa neih tûra rêl a ni a. Kum 1925 Assembly (tûna Synod Inkhâwmpui) pawhin September thlaa hman tûrin a tinghet zui a, tûn thlengin September thlaa hman a lo ni zui zêl ta a. Chuvângin, September thla hi kan Kohhran mite chuan ‘Beihrual thla’ tiin kan sawi hial thîn a ni.

Ringtu nun intuai tharna leh rawngbâwlna lam hawia hman a lo ni tâk hnu hian Beihrual thupuite neiin, zir ho tûra buatsaih a ni ta a. Nilai zân thupui nên inkawpin a bua chhuah a ni a. Kum 30 hma lam deuh atang tawh khân Beihrual tantirh lam hi Ramthar lam hawia hman niin, a tâwp lam hi Kristian chhûngkaw lam hawia hman a lo ni ta bawk a. Ramthar Hapta leh Kristian Chhûngkaw Hapta tiin Beihrual tanna leh tâwpna lam hi tih dân phungah kan lo neih hlen ta a ni.

Beihrual hman dân hi ennawn tûla hriain, Synod Inkhâwmpuiah te pawh sawi fo thin a ni a. Kum 2001 Synod Inkhâwmpui chuan Beihrual hman dân enthat a rawt a, Synod Executive Committee bawhzui tûrin a dah a. SEC-in ngun taka a zir chiana, a ngaihtuah hnuah Beihrual hman zui zêl dân tûr hi hetiang hian a rêl ta a ni (SEC 187:29).

1. Beihrual hi September thlaah hmang zêl ila.

2. Tualchhûng Kohhranin remchâng leh tha a tih angin Biak In leh in lamah hman pawlh thin a ni ang.

3. Thupui hi ram pum huapin Synod-in a la siam zêl ang a; amaherawhchu, a thupui leh Bible châng târlan bâkah a kaihhruaina thu ziak hi tûna kan hman lai aia tâwi deuh zâwka siam tûr a ni ang.

4. Mahni Kohhran tâna tangkai leh sâwt zâwka hmang duhte tân zau zâwka zalênna pêk a ni ang.

5. Kan Kohhran hmalâkna pawimawh– Kristian Chhûngkua, Ramthar leh Vântlâng nun siamthatna lam thilte hi hlamchhiah loh tûr a ni ang.

Kum 2002 Synod Executive Committee thurêl hi Beihrual hman dân chungchânga kalphung thar kan neih zui tâk hi a ni a. Chuvângin, he kalphung thar SEC-in a lo rêl ang hi zui kan tum tlân zêl pawh a tha ang. Kohhran miten Beihrual hunah hian kan ngaih dânte sawi chhuahna remchâng kan nei thei hi a lâwmawm a. Sawihona hun thâwl zâwk an neih theihna tûrin thupui hawngtute pawhin hun hman rei loh theih hrâm ni se a duhawm ang.

Beihrual chhûnga kan zir tûr hi a hnuaia târlan ang hian hlâwm thuma \hen a a ni.

September 1 – 9 Ramthar Hapta

September 10-20 PCI Thurin Sâwm

September 21-30 Kristian Chhûngkaw Hapta

Beihrual hi a bul tan atangin tawngtai rualnate hmangin urhsun taka tih ni se.

 (Courtesy: Nilai & Beihrual Thupui 2011)

 

BEIHRUAL THUPUITE:

Beihrual Thupuite hi chip chu sawi loh a thupui zei zei hi kan lo thlir lawk theih nan kan han chhawp chhuak dawn chauh a ni. Hun leh hmun kan nei lovah chhiartuten min lo ngaih sak theih chuan a lawmawm khawp ang.

Beihrual Kar khatna:

September 1               Ramthar rawngbâwlna chanchin tlângpui

September 2               Isua hi missionary ropui a ni

September 3               Isuan Chanchin Tha hril tûrin min tîr

September 4               Chawhnu         - Isua thupêk zawm a tûl

Zan                  - Chanchin Tha hi kawl ringawt tûr kan ni lo

Beihrual Kar Hnihna:

September 5               Chanchin Tha hrilna hmun

September 6               Chanchin Tha Mizoten kan chhawrzia

September 7               Chanchin Tha hriltu inbuatsaihna

September 8               Awm hmuna Chanchin Tha hril

September 9               Kal chhuaka Chanchin Tha hril

September 10             India ram Presbyterian Kohhran Thurin Tobul

September 11             Chawhnu         - Bible leh Thurin

Zan                  - Thurin pawimawhnate

Beihrual Kar Thumna:

September 12             Bible – Rinna leh thiltih tehna dik lo thei lo

September 13             Pathian pakhat chauh biak tûr

September 14             Pathian pakhata minung pathum

September 15             Mihring, Pathian anpuia siam

September 16             Mihring suala tlûk thu

September 17             Isua Krista leh a hnathawh

September 18             Chawhnu         - Ringtute tih tûr I-na

Zan -                Ringtute tih tûr II-na

Beihrual Kar Li-na:

September 19             Thlarau Thianghlim leh a hnathawh

September 20             Krista din chhuah Sakramen-te

September 21             Kristian Chhûngkua

September 22             Chhûngkaw Maichâm

September 23             Naupang ngaih pawimawh

September 24             Nupui pasal zawn dân

September 25                         KRISTIAN CHHÛNGKAW NI

Kum 2000 Synod Inkhâwmpui chuan September Pathianni hnuhnung ber hi Kristian chhûngkaw nia hman tûrin a rêl a. Synod Executive Committee chuan Sunday School inkhâwm tibuai lova hman ni se a ti bawk a (SEC 180:15). Chutiang tûr chuan programme hi chawhnu inkhâwm leh zân inkhâwma hman tûrin buatsaih a ni. Chawhnu inkhâwmah hian chhûngkaw tin inkhâwm tûra beisei an ni a, a theih chen chenah chhûngkuain thut ni bawk se.

Pathianni Chawhnu Inkhâwm

Thupui : Chhûngkua hi Pathian din a ni

Chhiar tûr : Gen. 1:26 -28; Lk. 2:21-24

Thupui Then

1. Chhûngkua hi Pathian din a ni.

2. Lal Isua hi chhûngkuaa piang leh seilian a ni.

3. Chhûngkaw hmangin khawvêl chhandam a ni

4. Kristian chhûngkaw din hi ringtu nu leh pa mawh a ni

Zan Inkhâwm

Thupui : Chhûngkuaa rawngbâwl

Chhiar tûr : Jos. 24:14-15; Tirh. 10:1-2

Thupui Then

1.  Pathianin a rawngbâwl tûrin chhûngkua a din

2. Chhûngkuaa rawngbâwlna - inkhâwm, thilpêk, tawngtai leh a  dangte

3. Chhûngkuaa rawngbâwl tûrin nu leh pa an pawimawh

4. Engtin nge hma kan lâk ang?

Beihrual Kar tawp ber:

September 26             Inneih sâwngbâwl dân

September 27             Nupa tan rual a pawimawh

September 28             Sum dah that (investment)

September 29             Buhfaithâm rawngbâwlna

September 30             Beihrual khaikhâwmna leh khârna

July  31, 2011 Puitling Sunday School Zirlai: Zirlai 28-na: 'Simna' -  Pathianni hmasa khan Sual Ngaihdamna chungchang kan zir a, vawiin hian a chhunzawmna ni awm tak SIMNA chungchang kan zir leh thung dawn a ni. Simna tih thu hi Bible thu pawimawh tak mai a ni. Chhandamna kan tih pawh hi Simna tello chuan chan theih a ni lo. Kan zirlai ziaktu hian a style hman rim tak rawn hmang lehin zirlai hi hlawm (topic) li- Simna Awmzia, Sim tur nei mihring, Sim zel leh sim hlen thu tih leh Simna chanchin tha tlangaupui tihah te a rawn then leh a ni.

Thuthlung thar leh hlui-in Simna chungchang an sawi dan hi tlemin in-ang lo hret a awm. Bible-in Simna hi engtin nge a sawi tih thute a bulthum a luhchilhin chik takin min bihpui a ni. Mi zawng zawng hian sim tur kan nei theuh tih hi kan zirlaiin min hrilh a tum pawimawh tak a ni bawk. Sual simna dik tak nei tur chuan Thlarau Thianghlim kan mamawh tih min hrilh bawk a ni. Zirlai zir hahthlak, pawimawh si a nih hmel e.

August 3, 2011 Nilai Thupui:  Tunkar Nilai zan hian Hun Hnuhnung Chhinchhiahna Lal Isua Sawi Dan tih kan zir dawn a. Thuthlungthar thuchah pawimawh ber zinga mi a ni. Hun hnuhnunga thil lo thleng tur Lal Isuan a sawinaah van lam thil-ni, thla leh arsite chunga thil danglam tak lo thlen tur thu a sawi a. Tin, Khawvel Sana an tih thin Juda(Israel) te chunga thil lo thleng tur a sawi bawk. Khawvel Politics virvel leh Astronomy zirna atanga a lan danin Lal Isua thusawi tam tak hi a lo thleng chho mek zel tih hai rual a ni tawh lo a. Hun hnuhnung khawvelah kan lut mek tih hi Science zirna atang pawhin phat rual a ni ta lo.Lal Isuan hun hnuhnung chungchanga a thusawi pawimawh tak takte zirlai hian min zirpui a, zirlai zir manhla tak a ni ang.

(Camping kan neih hnu-ah Rilru sawina hun kan hmang ta zauh zauh a. Hunin min daih mang lo fo mai. A lawmawm hle a ni. Amaherawhchu, Nilai zan zirlai sawihona hunah erawh duh angin sawi tur kan la tam tawk lo deuh em aw a tih theih. Kan rilru-a thu awmte aiin Pathian thu hi a pawimawh zawk fo tih kan hriat a tha hle. - Thlirtu)

 August 7, 2011 Puitling Sunday School Zirlai: Zirlai 29-na:  Kan la rawn chhawp chhuak hman lo deuh....

 
July  3, 2011 Puitling Sunday School Zirlai: Zirlai 24-na: 'Dam leh Hriselna thu - Tun Pathianni hi Synod ni pawimawh Hospital Sunday & Health Sunday a ni a, chumi lam hawiin zirlai pawh hi buatsaih a ni. He zirlaiah hian Natna leh a awmtirtu chungchanga zawhna pawimawh tak chu 'Engvang nge?' tih hi a ni a. Sual hnathawha ngaih vek hi a dik tawk loh zia te kan zirlai hian a rawn sawi lang a, a pawimawh zawk chu tuarna hi taksa leh thlarau mawlsawmna atana hman a ni a ti. Damna kawng thum a tarlanga a rinna leh damna inzawmzia pawh ngaihnawm takin a thai lang. Natna leh a awmtirtu zawng zawng laka min chhandam hi kan Pathian duh dan a ni a, chutih rual erawh chuan mihringten kan dam leh hrisel thu-ah mawh kan phur thui ve hle thung.Pathian chuan kan dam a duh avangin kan dam theih nan Lal Isua kan hnenah a rawn tir a ni tih min zirpui a tum a ni.


July  10, 2011 Puitling Sunday School Zirlai: Zirlai 25-na: 'Chhandamte nun - Hei hi Kristian Nun tih nen thuhmun tho a ni a, Krista chhandamna changtu nun sawi nan leh Krista nena inzawmna nei nun sawina a ni. Kan zirlaibu hian rinnaa nun chu ringtuah Krista a lo nung a ni tiin a sawi a. Nun tam tia kan sawi thin pawh hi a zat lam (quantity) aiin a that zia (quality) lam sawina ni zawk mahin a tarlang bawk. Chuvangin Chhandamte nun dan tur chu sual do ngam nun, thil tha tih nena in zawm tlat a ni tiin a sawi a, chu chu hmeng tangkaia lan chhuahtit turin min beisei a ni a ti.


July  17, 2011 Puitling Sunday School Zirlai: Zirlai 26-na: 'Sual Thupha Chawi -Kan zirlai hian sual thupha chawi awmzia te, a tih dan tur tha te, chumi in rah a chhuah dan leh chhandam ten sual inhriatna an neih dan te a rawn hai langin min zirtir a. Sual leh tihsual neilo mihring a awm theih loh va, chuvangin sual thupha chawi tur nei theuh kan ni. Sual thupha chawi dan tha leh dik kan hman a pawimawh a, chu chuan rah tha leh duhawm a chhuah thei dawn a ni. Hei vang hian vawiina kan zirlai tur hi zirlai pawimawh tak a ni a, ngaithla liam mai lova vawn reng chi a ni ngei ang.


July  24, 2011 Puitling Sunday School Zirlai: Zirlai 27-na: 'Sual Ngaihdamna - Tun tuma kan zirtur hi Thlarau Thianghlim hnathawh avanga ringtuten kan chan a ni a, ngaidam thei ve ngei tur pawhin min zirtir nghal tih hriat hmasak a tha. 'Kan chunga thil tisualte kan ngaidam angin Nang pawhin kan thil tihsual ngaidam ang che' tih kan sawi hian Pathian ngaihdamna chu tiamkam neiin kan dil tihna a ni a, midangte kan ngaidam hmasa phawt tur a ni tih a chiang reng a ni. Kan zirlai hian ngaihdamna awmzia te, ngaidamtu pathian leh ngaihdam ngai mihring inkar thu te, ngaihdamna rah leh inngaihdam tawnna te min thlirpui thuak thuak dawn a ni.



July 6, 2011 Nilai Thupui: 'Ringtute thawhlehna - Kan Zirlaibu siamtu hian lal Isua lo kal leh huna taksaa thawhlehna kawkin  min thlirpui dawn a ni. Chanchin Tha ziaktuten pathian rama luh, vanrama luh tia an sawi nen pawh a awmzia thuhmun a nih thu a rawn tarlang a. he nun hi sualna leh thihna hnehtu, thawhlehna nun, chatuan thlenga kan chhawm tur nunna a ni a ti. Ringtu nun hian Krista nun a tawmpui avangin sual leh thihna hneh thei nun a nei a, chu chu tirhloh Paula sawi dan pawh a ni. Nakina Lal Isua lo kal leh hunah he nunna nen vek hian kaihthawhin an awm dawn a ni tiin chutih hunah chuan chatuan nunna pawh a famkimin kan chang tawh ang a ti.


July 13, 2011 Nilai Thupui: 'Ringlote thawhlehna - Khawvel tawpah chuan Lal Isua a lokal ang a, chutih hunah chuan mitthite kaihthawhin an awm vek anga, ringtute chauh ni lovin ringlote pawh kaihthawhin an awm ang. Amaherawhchu, thawhlehna thu Daniela 12:3 a sawi hi a ngial a ngana pawm vek chiah ngaih a ni lo, khuhhawnna bu a nih avangin leh thu kalhmang dang deuh nei a nih avangin. Lal Isua ngeiin ringtu leh ring lote kaihthawha an awm hnua rorel saka an awm tur thu a sawina Bible-a kan hmuh ang hian Pathian a duh loh zawnga awmte leh sual hremna hi pumpelh mai mai theih a nih loh tur zia pawh a lang thei a ni.

July 20, 2011 Nilai Thupui: 'Lal Isua lo kal lehna -Kan Nilai zan bu-in a sawi dan tlangpui chu hetiang a ni; Lal Isua lo kal leh beiseina hi Bible zirtîrna a ni a. Amah Lal Isua ngeiin a lo kal leh tûr thu hi a tisa put lai nî khân a zirtîrte hnênah a sawi \hîn a (Mat. 24:30; 25:19,31; 26:64; Joh. 14:1-3). Lal Isua lo kal lehna hi mitthi thawhlehna leh rorêlna hnuhn

Vawiin thlengin Lal Isua lo kal hun leh ni chhûttute leh hrilhlâwktuten an la hrilhlâwk dik lo va, an chhût dik bawk hek lo va. A hmasa berin, Lal Isua hi amah ngei a lo kal leh dâwn a ni. Hêngte hi Lal Isua lo kal lehna nên thuhmuna ngaih tûr a ni lo. Pentikos nia Thlarau Thianghlim lo thleng kha a lo kal lehna ni se, Tirhkohten Lal Isua lo kal leh beiseina an nei tawh lo vang. Chuvângin, Lal Isua hi amah ngei taksa puin, mita hmuh theihin a lo kal leh dâwn a ni. Ropui takin, hnehna nên Lal Isua a lo kal leh dawn. A lo kal hmasak \um khân inngaitlâwm leh rethei takin, tlâwm takin a lo kal a. Lal Isua lo kal lehna hi sualna leh a thiltihtheihna a hnehna lantîrna a ni.

July 27, 2011 Nilai Thupui: 'Lal Isua lo kal lehna atana inbuatsaihna - Tun tum a kan zir tur hi Bible-a Lal Isua lo kalleh tur thu sawina hrang hrang atanga kan hmuhte kan zirlaibu hian min thlir kualpui thuak thuak dawn a ni. A hmasain Thuthlung Thar bu thenkhatin Lal Isua lo kal lehna atana inbuatsaih tura fuihna an ziahte rawn la chhuakin Chanchin Tha bu atangin bul min tan pui a, chutah Paula lehkhathawn leh lehkhathawn dangte atangin min hai pui leh a. Inring renga awm tura Lal Isua ngeiin a sawi chu A lo kal lehna atana inbuatsaihna tha tak a nih thu te, Pathian nena inpawlna tawngtai te, Kristaa awm reng te, sual kalsan leh thil tha tih te leh Chanchin Tha hrilte pawh a rawn tarlang a ni. Sawiho tur lamah Mizo zingah Lal Isua lokal lehna hmuah dan tha lo leh fel lova kan hriatte sawiho turin a rawn chhawp chhuak a, hei kan sawi duh dan a zirin chai tham leh ngaihnawm tak a ni thei ang.

February 16, 2011 Nilai Thupui: 'Hun hnuhnung thu - Zawlnei Ezekiela sawi dan' tih kan zirho leh dawn a. Zawlnei zinga hun hnuhnung thu sawi hnem ber a ni a, Kristian Thurin innghahna te pawh a sawi zingah hian a tel a ni.Sal tan hunlai zawlnei a ni. Puithiam chhungkua atanga seilian a nih avangin mite zah pawh a hlawh.

Kum zabi 8-na zawlnei ten an lo sawi tawh Pathian mite chunga chhiatna lo thleng chu thu an awih loh vanga Pathian hremna ni ngeiin a ngai a. Hetiang taka an bawhchhiatna leh khawlohna avanga hrem nimahse Pathianin a kalsan dawn lo tih hi Ezekiela hun hnuhnung thuchah pawimawh tak chu a ni. Ezekiela bu ah hian inlarna thu mak tak tak leh tehkhinthu leh entirnate hmanga ziak a nih avangin a ngial a ngana pawm theih loh thu tam tak a inzep a ni.

February 20, 2011 Pathianni Sunday School Zirlai: Tun tumah hian kan zirlai then khatnaa hlawm hnuhnung ber 'Chhandamna tobul leh pianphung' tih kan zir dawn a, kan zir fe tawh emaw tih laiin a tobulah kan la su leih leih chauh a ni. Kan zirlai hian Pathian chatuan thil tum a nih thu te, Pathian thlanna (election) pawimawh thu te leh Pathian nena inrem lehna chungchang min luhkhung pui dawn a ni.

Chhandamna hi Pathian kutchhuak leh duan vek Isua Kristaa lo lang, mihringte ban phak tura min pek a ni a. Siamthar kohhran hruaitu hmasate thu: Krista chauh tih hre renga Pathian lalna leh thu berna kan zir thar leh a duhawm hle ang.

Jan  30, 2011 Puitling Sunday School Zirlai: zirlai 4-na:

Zirlai 4-na ah hian “ Chhandam ngai Thilsiamte” tih kan zir ve thung dawn a ni. He zirlai hian Pathian chhandamna hi thilsiam zawng zawng tan pawh a ni vek tih a sawi a. Kan chenna min tawmpuitu thilsiam dangte tana chhandamna thu hi thil pawimawh tak a nih thu kan zir dawn a. Zirlai hi hlawm li-ah then a ni a, a hlawm khatnaah  Mihring te leh Pathian thilsiam dangte inrin tawn dan fel leh ropui tak hi Pathianin tha ti taka a siam a ni tih kan zir ang a. Hlawm hnihnaah chuan thilsiam zawng zawng chunga thunei ber chu Pathian a nih thu leh enkawltu atan mihringte a ruat dan te, nungcha humhalh pawimawh dan leh kan Kristian Thurin mila kan kalpui a tul thu te kan hmu a. Then thumna lamah chuan Siamtuin tha a tih ang tak, Chanchin Tha zirtirna angin mihringte hi awm vek thei ila chuan thilsiamte tan chhandamna  a ni dawn a,khawvel hi a nih tur ang takin a awm ngei ang, tuna kan awmdan ang hi chuan thilsiam dangte tan tuarna nasa tak thlentu kan ni ngei mai. A tawp berah chuan he lei hi mihringte avanga  anchhe  dawng  chhandam ngai a nih thu a sawi a ni. Heng chhandam ngai thilsiam dangte Chhandam hna thawk turin mihringte bawkin mawh kan phur ani tiin a tlang a kawm.

Feb 2, 2011 Nilai zan Thupui:

Tunkar Nilai zana kan zir tur hi “Hun hnuhnung thu – Zawlnei Isaia sawi dan” tih a ni a. Kan zirlaibu ziaktu hian a hma lama kan zir tawhte ang bawkin Zawlnei chanchin tlangpui min hmelhriattir hmasa leh phawt a. A hunlai khawvel inlumlet dan leh khawtlang dinhmunte min thlir kual pui thuak thuak a. Mithiam ten Zawlnei Isaia bu hi mi pathum kutchhuak nia an sawi chang chawiin an hunlai mila an thu ken leh puan chhuah inanglo hret hret te a rawn tarlang a. Isaia pakhatna chuan hun hnuhnung chungchang a sawina ah Pathian rorelna a chhe lam leh a tha lam a sawi te, Israel-te chungah leh an chhehvela hnamdangte chunga Pathian rorelna thlen tur thu a sawi te a rawn pho chhuak a. Isaia pahnihna chuan hun hnuhnung thuchah a sawite chu sal tangte thlamuanna lam thu a tam deuh a, Pathian rorelna lo thleng tur pawh a tha lam leh thlamuanawm lamin a sawi tih a rawn tarlang a. Isaia pathumna chuan Israelte demna leh an chunga Pathian hremna lo thlen tur te, Pathian ropuina an la hmuh tur lam te a sawi lang ve thung a. Tichuan zawlnei Isaia thlirna atang chuan hun hnuhnung chu thim ni lovin eng ni mah zawkin a ngaih theih niin kan zirlaibu siamtu hian a rawn hlawm khawm a ni.

Jan  23, 2011 Puitling Sunday School Zirlai: zirlai 3-na

Zirlai 3-na ah hian “Chhandam ngai Mihring” tih kan zir dawn a. Mihring leh a nihna chungchang chhui a niin, mahni inchhandam thei lo a nihzia te kan zirlai hian a sawi chiang hle a. Mihring dinhmun hriat chian a tulzia te, sual leh a nghawng pawi zia te pawh tarlan a ni. Kohhran thurin IV-na chu zirlaibu siamtu hian rawn lachhuakin Pahthianin mihring a din ropui zia leh Pathian anga siam a nih dan te pawh a rawn tarlang tel. Ropui taka din chhuah nimahsela khawlohna chuan a nihna zia a her kawitir tak avangin chhandam ngai a lo ni ta a. Mihringin Pathian a anna lai tak sawi dan hrang hrang awmte pawh kan zirlaiah hian kan hmu a. Kan thurin V-na sawi angin bawhchhiatna leh thihnaa a ma duhthu ngeia inbarh lut a nih zia  leh chu chuan Pathian hnen atanga thihna a thlen thu pawh chiang takin kan zir dawn a ni.

Kan zirlaibu siamtu hian Mihring chu mahni inchhandam thei lo a nihna leh chhandamtu mamawh a nih zia hi kan zirchhuah atan a duh hle a. Mihring leh a nihna Bible-in a sawite hi hriat chian a ngai hle niin a tarlang bawk.

Jan 26 Nilai zan Thupui:

Nilai zana kan zir tur hi “Hun hnuhnung thu- Zawlnei Amosa sawi dan” tih a ni a. Kum zabi 8-na zawlnei te zinga sawi hlawh ber leh ‘Lalpa Ni’ chungchang pawh sawi chhuaktu hmasa anga ngaih a ni bawk. Zirlaibu siamtu hian Zawlnei Amosa mimal chanchin hi min thlirpui hmasa a, a hunlai khawvel pawh min thlirkual pui thuak thuak bawk. Amosa hunlaia sualna langsar tak tak zingah milem biakna, mi rethei ngaihsak lohna te leh rorelna diklo leh hlemhletna te an tel. Hengte avang hia Pathian thinurna an tawng baw ngei dawn a, Lalpa Ni chu a lo thlen hun chuan a rapthlak hle dawn anga tarlan a ni. Israel te chungah chauh ni lovin an chhehvel h hnam dangte pawhin Pathian hnam thlante an hmuhsit leh tihhrehawm thin  avangin hremna an tawk ve tho dawn a,  hei hian Pathian lalzia, hnam tin chunga roreltu a nihna pawh a tarlang chiang hle dawn a ni. Hun hnuhnunga hremna leh chhiatna nasa tak lo thleng tur sawi lan a nih ruala chhinchhiah tlak tak lo lang tel chu sima Pathian lam hawi tan chuan beisei tur  a awm tih hi a ni.

January 16, 2011 Puitling Sunday School Zirlai Thlirlawkna:

Tun tuma kan zirlai tur hi “Chhandamtu Pathian” tih zirlai 2-na a ni a. Kristian thurin hlawm lian tak chu kawng li tawi te tea zir turin zirlaibu siamtu hian a rawn chhawp chhuak a. Pathian leh a nihna thu te, Pathian pakhata minung pathum (Trinity) thu te, siamtu leh enkawltu Pathian a nihna leh hmangaihtu leh chhandamtu Pathian a nih chungchangte kan sir dawn a ni. Pathian hriat loh te, hriat chian loh te leh hriat dik lohte hi a pawi thei hle a ni tih pawh zir chhuah kan tum a tha ang.

Pathian nihna ze hrang hrang te hian Chhandamtu Pathian a nihzia a lantir vek a ni tih chu kan zirlai atang hian a hriat theih a. Pathian dangte aia kan Bible-a kan Pathian hmuh hian danglamna a neih chu siamtu leh enkawltu tha bik, biak dan dika betu nun dik (ethical behavior) a ken tel vang a ni. Trinity chungchang hi inhnial theih tak ni mahse mihring te hian Pathian nihna thuril thuk tak hi kan hre fiah tak tak thei lova, chuvangin Bible pumpuia a lan dan Pa Pathian, Fapa Pathian, Thlarau Thianghlim Pathian Pathian pakhata minung pathum hi rin hmiah mai tur a ni. Chhandamtu Pathian leh a nihna hriat chian deuh deuh hi chhandamna thu-ah kan tan a tul hle a ni.

January 19, 2011 Nilai zan Thupui:

Kumin Nilai zan thupui hi Rev. Dr. H. Vanlalauva buatsaih a ni a, “Hun hnuhnung thu” tih a ni. Zirlai thupui hi a sei hlawm tlangpui a, kum dang zawng aiin a bu pawh a chhah a, Kristiante tan thupui pawimawh tak a nih vangin uluk taka zir atan a duhawm hle.  Jan 19 zana kan zir tur hi ‘Thuthlung Hluiin Lalpa Ni a sawi dan’ tih a ni a, ‘Lalpa Ni’ awmzia leh an beisei dan te tarlan a ni. He ni hi lo la thleng tur, hun tha lo leh thim sawi nan an hmang nasa hle tih kan zirlaibu hian min hrilh a. Chutih laiin Lalpa tana mi dik leh rinawm tlatte tan chuan ni lawmawm leh hun thlakhlelhawm a nih thu pawh an sawi hmaih bik lo. A thalo lam hi a thawm a rin zawk thin avangin a eng lam thlir hmaih lo turin zirtute zirlai siamtu hian a duh tih a lang.